نبدأ بسم الله
نورتونا و كترتونا
جوة كل فصل حياة كل انسان فينا .
تفاصيل بنعيشها كل يوم
بس الاهم اننا نتعلم منها
نتعلم الدرس ونستفيد
جوة كل فصل هنضحك و يمكن نبكي شوية و هنتسلي
بس الاهم اني بتمني ان الدرس يوصلكم و تستفيدوا منه ..
اسيبكم تعيشوا معايا التفاصيل
المدير : أنتي أزاي تكتبي الكلام دة في التقرير ؟!
مريم : عشان دي الحقيقة حضرتك مش إحنا المفروض بنقول الحقيقة ولا أيه ؟
المدير : أنتي هتعرفيني شغلي ولا ايه يا أستاذة مريم ! التقرير دة يتلغي فورا و تكتبي المعلومات اللي هبعتهالك مع سلوى
مريم : مين سلوى ؟
المدير : السكرتيرة الجديدة .. ! متطلعيش برة الموضوع من فضلك
مريم : بس انا مش هكدب ومش هقول المعلومات الغلط دي !
ولا حضرتك عايز تبقالهم أحمد موسى!
المدير : أنتي أزاي تتكلمي بالوقاحة دي !! أنتي مطرودة يا أستاذة
مريم : مطرودة مطرودة هو يعني انا بشتغل في الوزارة!
سلام يا أستاذ أحمد موسى
الحوار دة كان على مرأى ومسمع من كل اللي في المجلة
برغم إننا مجلتنا عن الموضة و الفن و النجوم لكن لا تخلو من بعض الأخبار سواء السياسية أو العامة أو حتى الصحية زى حملات تفتيش على المحلات لإعدام الطعام الفاسد ومحاسبة اللي بيتاجروا فيه
زى انتشار وباء معين لا قدر الله أو إي أخبار عاجلة بتحصل !
طلعت وانا ماشية بمبدأ واثق الخطى يمشي ملكاً
وخطوات ثابتة واثقة من نفسها و كله بيبصلي طبعا
و عارفين إني صح بس محدش بيقدر
يتكلم عشان خايفين على لقمة عيشهم ..
طلعت من المجلة بكل ثقة و مسكت تليفوني
مريم: الو .. الحقيني يا اميرااااااااع
اميره : مالك يا بت يا مريم بتعيطي كدة لييييه
يابت اهدي فيكي اييييه ؟!
مريم : اتطردت من المجلة يا اميراااااا الحقيني
أميره : هببتي ايه تاني يا حزينة .. اتسحبتي من لسانك وقولتي ايه ؟؟
مريم : مقولتش حاجة .. اتخانقت مع استاذ سعد المدير و قولتله انت عايز
تبقي احمد موسى
اميره : يخربييييتك يا مجنونة قولتي للمدير كدااا ؟!
مريم : اه وفيها ايه ؟! كانت في حملة من الطب البيطري لفحص الدواجن
و اكتشفوا ان اغلب الطيور مصابة بانفلونزا الطيور و مع ذلك ما زالت بتتباع!
بقوله ننزل الخبر عشان الناس تحذر يقولي لا اكتبي ان الكلام دة و ان كل
حاجة تمام و عاملي تقرير كله مزور يا اميرة .. اسكت يعني!!
أميره : لا ازااي ؟ لازم نتسحب من لساننا و نرمي دبش و نشتم الناس
استني يا مصيبة انا جيالك
اوعي تكوني عيطتي وانتي طالعة ؟
مريم : لا .. كنت واثقة في نفسي ثقة ابوكي وهو بيصلح التلاجة
اميره : اه و بنتكهرب فيها بعد كدة
- بالظبط
أميره : استنيني عند الكافيه انا جيالك اما اشوف اخرتها معاكي ادي اخرة اللي يصاحب اشكا... بتقفلي في وشي يا عرة الصحاب ..
....
وانا معدية رايحة الكافيه عشان استني اميرة .. كنت ماشية بعيط و عمال ابرطم مع نفسي
و اذ فجأة واحد ماشي بضهره ف اتخبط فيا .. !
مريم : ايه يا أستاذ أنت مش تفتح أنت أزاي تمشي تخبط في الناس كده و أزاي تمشي بضهرك وسط الشارع كده أصلا
كنت عمال ازعقله وهو متنح ..
= اسف ..
مريم : دة اللي ربنا قدرك عليه!!
= ايوة يعني ايه المطلوب مني بالظبط مش فاهم! خبطتك غصب عني و اعتذرت .. اعمل ايه تاني!
كانوا صحابه واقفين بعيد وبيضحكوا عليه و الحقيقة ان اميرة كانت وصلت في الوقت المناسب لإني مكنتش لاقيه رد و كنت هطلع ضيقي عليه تقريبا
وكنت ببرطم ف جت و قالتله
أميره : شكرا شكرا حصل خير حصل خير
مريم : استني يعني يخبطني و تقوليله حصل خير !!!
أميره : امشي يا مريم خلي نهارك يفوت امشششييي
و زقتني و مشينا ..
أميره : ايييه يا مريم بتتخانقي مع دبان وشك! اهدي كدة
مريم : اتطردت يا اميرة اعمل ايه دلوقتي ولا اقول لأمي ايييه
أميره : ما هو يا مريم مكنش ينفع تطولي لسانك كدة يا حبيبتي
مريم : بقولك ايه متقعديش تقطمي فيا
و اه وقوليلي اني صح وهديني
أميره : حاضر يا آخرة صبري أنتي صح يا حبيبتي انتي صح و كنتي ضربتيه بالكرسي كمان ولا بشنطتك كدة قبل ما تمشي!
مريم : لا مكنش هينفع عشان الزمايل كانوا بيتفرجوا و مصطفى كان معاهم
أميره : يادي مصطفى انتي مش كنتي قولتي نسيتيه و شيلتيه من دماغك خالص !
مريم : انتي تعرفي عني اني بثبت على كلمة ؟!
أميره : لا ازاااي
اهدي بس و تعالي نطلب اكل
مريم : ماشي♥
" فلاش باك "
كنت قاعد مع صحابي بنهزر و بنعمل تحديات مع بعض بما اننا مش بنشوف بعض كتير بسبب اللي عنده شغل واللي وراه بيت فبنحب نستمتع بوقتنا لما بنتلم سوا و نرجع عشر سنين ورا الحقيقه اننا بنشحن نفسنا بـ طاقة ايجابية كبيرة بلحظات السعادة دي عشان نقدر نكمل
انا موسى .. النهاردة كملت 29 سنة من الاجمالي اللي معرفوش ..
بشتغل محامي و بحب الأهلي..
كان يوم ميلادي في صحابي قرروا يحتفلوا معايا بيه
كنا ماشيين في الشارع في اليوم دة و هما اتحدوني امشي بضهري وانا مغمض .. كان الشارع فاضي اصلا ف قبلت التحدي !!
و اتخبطت فيها !
طول عمري اسمع ان الحب ممكن يجي من اول نظرة اه بس بسبب ابتسامة او نظرة حلوة او ملامح او ايا كان السبب الظاهري ايه و مكنتش بقتنع بكدة اساسا و مقتنع ان الشخص لازم يعرف الشخص عشان يحبه !!
لكن عمري ما شوفت قلب يدق لحد وهو بيعيط!!
يعني مشوفتش انا حب من اول نظرة ولا ان حد يحب حد لمجرد شافه بيعيط!!
شوفتها ماشية تعيط زي العيال و فجأة لقيتها كإنها جون سينا وهي بتكلمني
فوراً جه في دماغي " سترونج اندبنتد عيوطة " 😂
اعتذرتلها و كنت شارد اصلا مع تفاصيلها وهي عمال تتخانق كنت هاين عليا احط ايدي على بقها اقولها اسكتي بقي اسكتي يخربيت صداعك يا شيخة دة انتي مزعجة😂💔
دة انا للحظة حسيت انها عايزة تضربني اه والله 😂
و الشباب واقفين فاصلين ضحك عليا و روحتلهم و غيرنا الموضوع و يا دار ما دخلك شر ..
حبيتها ؟ اه حبيتها و معرفش حتى اسمها ايه و محدش يسألني ازاي!
بس للأسف الصورة اللي فـ بالي ليها وهي بتعيط او بتتخانق 😂
كنت بالليل و بفكر وبكلم نفسي
انت عبيط ؟! ولا بتستهبل ! انت تعرفها أساساً ؟ ولا تعرف اسمها ايه حتى !!
دي كانت عايزة تضربك يخربيتك!
طب والله انت شخص مهزء
نام نام وبطل تفكير دة انت عندك اعاقة ف مشاعرك اصلا
نمت وانا بضحك على خيبتي والله
بس توقعت انها بتروح للكافيه دة لإن اتجاهها كان ليه هي وصحبتها
محامي بقى معلش .. بهتم بكل تفصيلة
بقيت اروح كل يوم بعد شغلي بس مبلاقيهاش للاسف ..
لحد ما في مرة بعد حوالي اسبوع لقيت صحبتها اللي كانت معاها اسمها اميرة تقريبا
كانت داخلة و قعدت و طلبت قهوة ..
قومت روحتلها
- السلام عليكم
أميرة : و عليكم السلام !
- انسة أميرة ؟
أميرة : ايوة ! مين حضرتك ؟! مش أنت اللي .... !!
موسي : اه انا اللي ..
انا موسى .. محامي ..
أميرة : : اهلا بحضرتك .. !
موسي : ممكن اقعد ؟ هاخد خمس دقايق بس من وقتك من فضلك ممكن ؟!
أميره : اتفضل!
موسي : من الآخر و من غير لف ولا دوران
انا معجب بصحبتك و عايز اتقدملها ...
أميرة: مريم !!!!!
موسي : هي اسمها مريم ؟!
أميرة : حضرتك كمان متعرفش اسمها ؟!
اومال معجب بيها ازاي!!
أميرة : والله ما عارف اقولك ايه
موسي : بس انا فعلا من يومها وانا معجب بيها فعلا و باجي هنا كل يوم عشان احاول اعرف اي تفاصيل ومش عارف ! فبطلب منك تساعديني
أميرة : ااه! مريم .. ممم طيب هحاول حاضر اليوم اياه!!
ايه اليوم اللي مليان كوارث دة ياربي
موسي : طب ممكن تديني اسمها مثلا وعنوانهم او عندها كام سنة بتشتغل ولا لا مثلا
أميرة : مريم صحفية في مجلة كوكتيلات اللي ف آخر الشارع ..
خريجة اعلام بقالها سنتين .. عندها 24 سنة تقريبا
موسي : الله صحفية
أميرة : هاه ؟! اااه صحفية .. بس اترفدت يوم ما خبطت فيها
موسي : الظاهر ان اليوم دة كان كله كوارث فعلا انتي مبتكدبيش
هستأذنك .. طولت عليكي
بس هتواصل معاكي ازاي ؟!
أميرة : طيب حضرتك بص انا باجي هنا علطول ..
انا هكلمها و لو وافقت ف ان شاء الله هتلاقيني هنا ف نفس الوقت بعد اسبوع اديلك باقي التفاصيل .. اتفقنا ؟
موسي : ولو إن أسبوع كتير بس ماشي اللي تشوفيه .. استأذنك . . السلام عليكم
أميرة : أتفضل .. و عليكم السلام
... دة ايه البلاوي دي .. طب و مصطفى ولا البت أصلا دي هتطفشهم كلهم بالدبش اللي بترميه دة !
استر يارب
أميرة : الوو أنتي فين يا زفته مستنياكي من بدري
مريم : انا جاية ف الطريق اهوو
أميرة : بصي روحي استنيني ف الكافيه التاني اياه و انا هاجيلك على هناك
مريم : ليييه يا بنتي ما احنا بنقعد هنا علطول
أميرة : اسمعي بس الكلام عايزاكي في حاجة مهمة مش هتنفع هنا
مريم : ايه هتبلغي عن الكافيه ولا ايه !
أميرة : صبرني يا رب ..
مريم : خلاص متقفشيش كدة .. اطلع يسطى على شارع الجمهورية لو سمحت
تعالي بسرعة يا أميرة مش قادرة استني و اعرف في ايه
أميرة : جااية يا ستي .. سلام
أميرة : سلااا.. قفلت ف وشي الحيوانة
.....
مريم : ها يا ستي قول
أميرة : وعليكم السلام يا مسلمة يا مؤدبة
مريم : اه صح .. السلام عليكم
أميرة : اقعدي .. بصي فاكرة يوم ما اترفدتي ؟
مريم : إلهي يتنكد عليكي يا بعيدة .. جيباني هنا عشان تقوليلي يوم ما اترفدتي
أميرة : يارب صبرني يارب عشان مقتلهاش
مريم : قوولي
أميرة : فاكرة الواد اللي كنتي هتضربيه في الشارع
مريم : ليه مصممة تفكريني بأسوأ ذكرياتي النهاردة مش فاهمة!
اميره من الآخر كدة .. هو كلمني ف الكافيه التاني و معجب بيكي عايز يتقدملك
مريم : ايييييه!!
أميرة : وطي صوتك يا حيوانة الناس حوالينا
مريم : اييييه * بصوت واطي *
ازاي يعني و قولتيله ايه وعملتي ايه
أميرة : معملتش حاجة يا ستي اهدي
قولتله هقولها و ارد عليك
مريم : بس انا عايزة مصطفى يا اميرة
أميرة : مصطفى ايه و بتاع ايه انتي كمان هو معبرك اساسا ؟! و بعدين دة واد فرفور مش بتاع بيوت
مريم : طب ما انا كمان فرفورة يا أميرة
أميرة : مريم .. اتلمي و خليكي واقعية ..
مصطفى قالك اي حاجه ؟ لمحلك بأي حاجة ؟
مريم : لا
أميرة : يبقي عايشة ليه في وهم ؟ فوقي
و شوفي اللي شاريكي و عايز يفتح بيت مش اللي بيستعبط
دة حتي مسألش عليكي من ساعة ما مشيتي
مريم : قولتيله هتردي عليه امتى ؟
أميرة : بعد اسبوع
مريم : هو اسمه ايه اصلا و بيشتغل ايه دة!
أميرة : اسمه موسى و قال انه محامي تقريبا
مريم : تمام هفكر و ارد عليكي
أميرة : اشطة .. نطلب اكل ؟
مريم : نطلب اكل يبشة ♥
.....
مريم : أزيك يا مصطفى
مصطفي : ميين ! مريم !
عاش من شافك
مريم : الله يشوفك
مصطفي : إيه؟!
مريم : هاه! معلش متوترة شوية المهم انت اخبارك ايه
مصطفي : الحمد لله تمام انتي عامله ايه ومبتسأليش ليه
مريم : المفروض ان انت اللي تسأل مثلا عني وخصوصا ان انا اللي اترفدت و قدام الجميع يعني
دة انت حتى مجيتش تواسيني بعدها
مصطفي : يا بنتي هو انتي حد قدك دة انتي كنتي هتاكلي سعد
مريم : مش مبرر والله .. و خصوصا انك عارفني يعني و اني اكيد دة. كله كان ظاهريا بس
مصطفي : يمكن اه .. عموما يا ستي انا اسف
مريم : عادي ولا يهمك ..
مصطفي : صح نسيت أقولك .. مش تباركيلي ؟؟
مريم : ايه اترقيت ؟
مصطفي : عرفتي ازاي يا بنت اللذينا
- خمنت .. الف الف مبارك عليك يارب تبقي وش السعد عليك
ولا بلاش وش سعد عشان مبيجيش من وشه خير
يارب تبقي وش مريم عليك
مصطفي : ههههه الله يبارك فيكي
باركيلي كمان مرة
...
معرفش ليه حسيت قلبي اتخطف للحظتها و كإن روحي بتتسحب
مريم : الف مبروك بس على ايه ؟
مصطفي : هرتبط ان شاء الله
مريم : اه ومين سعيدة الحظ
مصطفي : ومالك بتقوليها من غير نفس ليه كدة
واحدة تعرفيها بس مش اوي يعني
مريم : مين ؟
مصطفي : مريم انتي كويسة ؟ حاسس انك اتغيرتي فجأة ووشك اتخطف انتي كويسه ؟ اروحك طيب لو تعبانة
مريم : لالا انا كويسة متقلقش
مقولتليش مين ؟!
مصطفي : سلمى .. السكرتيرة الجديدة في المجلة
مريم : ااه .. جميلة سلمى .. ربنا يهنيكم
استأذنك همشي عشان ورايا حاجات مش مهمة
مصطفي : طيب اتفضلي
.....
مريم : هيرتبط يا أميرة
أميرة : مين ؟
مريم : سلمى
أميره : مين اللي هيرتبط و مين سلمى ؟!
مريم : مصطفى يا أميرة .. مصطفى .. سلمي السكرتيرة الجديدة في المجلة ..
أميرة : و انتي كنتي هناك بتعملي ايه
مريم : مروحتش .. كنت في الكافيه و لقيته ف سلمت عليه
أميرة : ما قولتلك انه لو عايزك كان قالك .. و بعدين بذمتك دة بتاع جواز ؟ اهو قالك هيرتبط يعني اصلا مش هيخطب ولو خطب برضو ميلزمناش دة حتى لو بيحبك هنصحك تبعدي عنه لإني حساه عيل اساسا يا بنتي دة لابس حظاظات تكفي شباب مصر كلهم .. و ايه شعره اللي موقفه مترين لفوق دة!
بذمتك ترضيها لنفسك
دة طول عمري اقول ذوقك حلو مش عارفة ليه عند دة وحسيت مختارة فردة شبشب
مريم : مسألش عني من ساعتها
أميرة : يا بنتي افهمي بقي
خلينا فـ موسى .. بصي ؟! اقسم بالله فرق رهيب بينهم
برغم انه قصير شويه بس مش مشكلة
مريم : قوليله يجي يتقدم و هستخير ربنا و اشوف
انا واثقة ان ربنا هيختارلي الخير
أميرة : على بركة الله ..
لما جه بيتنا كنت مكسوفة خالص اطلع .. انا دبش اه و بعترف .. بس بتكسف والله
طلعت و سابونا لوحدنا شوية
موسي : السلام عليكم
مريم : وعليكم السلام
موسي : أزيك يا انسة مريم
مريم : الحمد لله بخير وحضرتك
موسي : الحمد لله .. بصراحة متخيل هتقومي تضربيني
مريم : حضرتك قلبك اسود اوي
موسي : لالا افتكرت بس .. على فكرة دة كان سوء تفاهم والله و انا اسف جدا
مريم : لالا عادي انا اللي بعتذر كنت بمر بفترة صعبة وكدة
موسي : اه اترفدتي من الشغل تقريبا
مريم : يا أميرة ياعرة الصحاب .. هي قالتلك
موسي : مش بالظبط يعني . . المهم كلميني عن نفسك شوية ..
....
اتكلمنا كتير جدا .. محسيتش بالوقت خالص حسيت الوقت بيمر خطف كدة .. حسيت إني اعرفه من زمان . . انا يمكن تافهة شوية و سطحية احيانا و اختياراتي ساعات تبقي غلط
بس حقيقي بعرف اقرا الشخصيات كويس
يمكن اختياري لمصطفى كان غلط و غلط جدا و كنت عارفة من جوايا بس بكابر .. و مزعلتش عليه كتير لإني اختياري كان غلط اصلا!
و انا من النوع اللي مبحبش استني و بقوم بسرعة بعد كل ضربة باخدها .. بقوم و برتب نفسي من جديد و بكمل
مينفعش اضيع وقت و اقف مكاني .. الحياة مش هتستناني
وافقت على موسى .. و حقيقي لقاءنا كان اغرب صدفة في حياتي
حسيته قريب جدا مني و بيسأل عني باهتمام من نفسه من غير ما انا اطلب!
شخصيته متمثلة في أب قبل اي حاجة تاني
بيعرف يحتويني في كل حالاتي
بيهتم من قلبه .. متقبل تفاهتي و احيانا الدبش بتاعي اللي مش عارفة ابطله
شخص يتقال عليه راجل بجد .. طبعا كل دة غير فرحة اميرة بينا
موسي : انتي يا حجة
مريم : يسمع منك ربنا والله
موسي : مبترديش ليه على التليفون
مريم : كنت نايمة
موسي : يارب صبرني .. نوم الهنا يا حبيبتي
اقعد انا مستني عشان تنامي
مريم : منامش يعني
موسي : نامي .. نامي نامت عليكي ..
مريم : اييييييه ؟!
موسي : مخدة ريش نعام يا حبيبتي
مخدة ريش نعام
......
.... بعد اربع شهور كتبنا كتابنا .. و ياما عيطتله و راضاني والله
- قبل الفرح بيومين -
مريم : موسى
موسي : عيون موسى
مريم : هنسمي أول ولد لينا أحمد
موسي : طب ليه الاذية دي طيب
مريم : عشان تطبلولي أنت وهو تبقوا احمد موسى خاصتي
موسي : موافق
مريم : بجد
موسي : اه والله ..
الا صحيح يا مريم انتي اترفدتي ليه من الشغل
مريم : عشان هزقت المدير
موسي : قولتيله ايه
مريم : قولتله يلا يا احمد موسى
موسي : اومال هو اسمه ايه
مريم : سعد مع اننا مشوفناش معاه يوم سعيد الحزين دا
موسي : يا بنت الايه. قصدك تشتميه فعلا
مريم : اومال انت فاكر ايه
موسي : سترونج اندبنتد عيوطة
مريم : انا يا موسى ؟!
موسي : لا يا حبيبتي انتي ست البنات
مريم : ابتديت تتعلم اهو
موسي : دبش بس طيبة والله انا بحبك
مريم : وانا بحبك
موسي : بقلب ووردة ؟
مريم : بقلب ووردة آه
قرأنا و عيشنا تفاصيل كتير يمكن مشابهة لحياتنا او حياة اللي حوالينا
يمكن نظرنالها بنظرة مختلفة
يمكن اختلفت ردود افعالنا
يمكن بنحسبها غلط
يمكن مش فاهمين
بتمني نكون طلعنا ولو بحاجة واحدة ممكن تنفعنا
في لقاء مع جزء تاني ان شاء الله
لمزيد من القصص زورو حسابنا علي الفيسبوك
https://www.facebook.com/RANNOOD20
وعبر موقعنا دقة قلب
ليست هناك تعليقات:
إرسال تعليق