الجزء الثاني من زرع حصد
الحاجة فوزية شافت الخمسين جنيه وبكت من الفرحة وعرفت ان محمود اللى سابها .
الحاجة فوزية .. واد يا احمد
احمد .. نعم يا ستي
الحاجة فوزية .. نفسك تاكل ايه ياحبيبي
احمد .. انا كل يوم باكل فول الصبح نفسي بكره اكل فول ومعاه بيض او بطاطس
الحاجة فوزية .. يا حبيبي يابنى . لا انا النهاردة وبكره هجبلك تاكل فراخ ايه رأيك ؟
احمد .. نفسي اكل فرخة زي اللى بشوفها بتتشوي فى المطعم عند عم علي
الحاجة فوزية .. من عنيه الاتنين ياحبيبي تعالى يلا اجبلك الفرخة .
مسكت ايد احمد وراحت على مطعم عم علي واشترت له نص فرخة ب30 جنيه ياكل ربع دلوقتى وربع بكره الصبح وطبعا هيا مش بتاكل الحاحات دي فا اشترت كيس فول وبجنيه مخلل وروحت البيت عملت طبق فول بالكمون وليمون وكلت وكأنها بتاكل كباب ونامت مبسوطة واحمد كمان نام مبسوط وكل ده ب30 جنيه من ال50 بتاعت محمود .
الشيخ عمر .. دلوقتي يا جماعة احنا متجمعين النهاردة عشان نشوف حصل للست فوزيه والطفل اليتيم اللي في رقبتها ده
محمود .. اللي يقدر يدفع معانا علشان نعمل راتب شهري للست دي يدفع اللي مش هيقدر يشاركنا بوقفتوا معاها ممكن يعمل حاجة حلوة احسن من الفلوس يعني مثلا الصبح كده وانت ماشي صبح عليها قلها اى خدمة يا حاجة هتقولك ربنا يخليك يابنى بس وامشي مش هتخسر حاجة بس حسسها اننا كلنا ولادها وجمبها وده واجب علينا كشباب فى الحارة .
الشيخ عمر .. سامعين يا شباب كلام محمود الله يباركلك يابنى المهم دلوقتى مين هيدفع الشهر ده عشان نبعتلها الفلوس
مؤمن .. انا هدفع 15 جنيه
علي .. وانا هدفع 20
خالد .. وانا هدفع 10
استاذ ابراهيم .. انا هدفع 100
محمود .. وانا هدفع 20
الحاج ربيع .. وانا هدفع 40
عم احمد .. وانا هدفع 30
الشيخ رجب .. وانا هدفع 50
الشيخ عمر .. وانا هدفع 80
الشيخ عمر .. مشاء الله كده معانا 365 جنيه يا رجالة بارك الله فيكم ايوة كده يا شباب المسلمين الله يباركلكم
عم احمد .. ايه يا عمر احنا رايحين نحارب براحة ياعم الشيخ شباب المسلمين والله اكبر اهدي شوية هاهاها
الشيخ عمر .. هاهااهههههه
عم احمد .. ابو مينا المسيحي اللى ساكن عندنا فى البيت راجل محترم لو عرف حاجة زي كده مش هيتأخر وانا بسمع انو بيعمل خير كتير
محمود .. ايوة ابو مينا راجل محترم ويعرف ربنا كويس
الشيخ عمر .. مافيش مشاكل كلموا يا عم احمد وضمو معانا
عم احمد .. ان شاء الله هقولوا لما اشوفوا
محمود .. يلا بينا يا شيخ عمر ناخد الفلوس ونتكل على الله احنا قبل ما الحاجة فوزية تنام .
الشيخ عمر .. يلا بينا . ربنا يباركلكم يا رجالة السلام عليكم احنا
وعليكم السلام ورحمة الله وبركاتو
الشيخ عمرخد محمود وخبط على الحاجة فوزية ومحدش بيفتح الباب .
الشيخ عمر .. يظهر انها نايمة يا محمود يلا نمشي ونيجي بكره
محمود .. لا بالله عليك لو نايمة نصحيها عشان تاخد الفلوس وتنام فرحانة
الحاجة فوزيه .. مين !!
محمود .. صحيت اهيه .. انا محمود يا حاجة
الشيخ عمر .. السلام عليكم
الحاجة فوزيه .. وعليكم السلام اهلا اهلا اتفضلوا
محمود .. لا شكرا يا حاجة احنا جايبين ليكي امانة عايزين نديهالك ونمشي
الشيخ عمر .. اتفضلي يا حاجة الظرف دا من عند ربنا مافيش حاجة من عندنا احنا
الحاجة فوزيه .. لا ابدا والله لا
الشيخ عمر .. امسكي يا حاجة متكسفيش ايدي انتى زي والدتى يلا السلام عليكم
الحاجة فوزيه .. كده طيب ينفع تمشي كده من غير ما تشرب حاجة . طيب اتفضل انت يا محمود .
محمود .. شكرا يا حاجة يلا السلام عليكم
الحاجة فوزية .. وعليكم السلام
خدت الظرف وشافت الفلوس وكانت هتطير من الفرحة وبتبص على احمد لقيت احمد نايم وعلى صدرو ربع الفرخة التاني علشان اول ما يقوم من النوم ياكلوا على طول بصراحة منظر يجرح .
الحاجة فوزيه .. قوم يا احمد قوم يابنى قوم يلا كل الفرخة دي متسبهاش كده وبكره انا هجبلك تانى .
انتظرو الجزء الثالث
ليست هناك تعليقات:
إرسال تعليق