قصة سمية منذ زواجها الصالوناتي - موقع دقة قلب

اسمى سميه عمرى ٤٨ عاما من٣٠ سنه اتجوزت واحد زي ما بتقول جواز صالونات. حبيته جداا جدا وهو كمان مش هنكر فضلنا ف سعاده لمده ثلاث سنوات بدون خلفه. طبعا انتو عارفين بقا اللى حصل من حماتى وكل اللى يقولى ايه انتى لسه وخلافه ؛ الكلام كلكم عارفينه المهم روحنا كشفنا كتييير جدا وكل الدكاتره قالو مفيش مانع للحمل مفيش اى سبب يمنع الحمل وده ف حد ذاته سبب مالوش علاج. عيشنا سنتين كمان ع الدكاتره وهو هو نفس الكلام حماتى مسبتنيش ف حالى وهى معاها حق نفسها تشوف عيال ابنها وخصوصا انه وحيد وماشاء الله مستواهم حلو جدا. طبعا من الحاله اللى وصلنا ليها خوفت انى ا فقد حبه أقنعته يتجوز ومامته اللى اختارت له العروسه وسيبت شقتى له ونزلت ف الدور الارضى وحتى الشقه اللى هى كانت شقتى مسحتها بدموعى فعلا وظبطتها وجهزتها له للزواج واتجوز تقدرو تقولو نسينى سنه او سنتين يادوب بس كنت بشوفو كل شهر عشان المصاريف وحتى حماتى كانت تيجى تطلع فوق ومتسألش عليا وضرتى كانت تتعمد تمسح السلم وتغرق الشقه تحت ميه وكنت بسكت لدرجه أن بعد ٥ سنين من حوازها جت خبطت عليا وضربتنى بدون سبب ونزفت دم كتير ومقولتش ليها حاجه ولا لجوزى عشان ما اكون سبب المشاكل ويطلقنى انا ماليش حد غيره خوفى من انى اكون ف الشارع او لوحدى خوفنى اعمل اى حاجه محدش يقولى انتى ضعيفه انا خايفه والله المهم جوزى شافنى بالمنظر ده قالى مالك قلتله وقعت ع السلم. وصدق طبعا ف الفتره ال ٥ سنين دى كان معاه ولدين. يمكن مشوفتهمش غير ٤ مرات اول مره يوم السبوع للطفل الاول وكانت أول مره ادخل الشقه بعد جوازه وادخل اوضة نومى الاقيها فيها طبعا معامله زفت ومكنتش راضيه تدينى الولد اشوفو وقالت ف وشى هتحسديه. جوزى خده منها مقدرتش تتكلم جيت بشيله جسمى اترعش وكان هيقع منى جوزى شاله من بسرعه ولاقيت نفسي بعيط جامد معرفش ليه هى فضلت تشتم وتقوله شايف عايزه توقعه وتموته وكلام غريب وحماتى ف عز عياطى ضربتنى بالقلم قدام الناس الوحيده اللى دافعت عنى هى ام ضرتى. قالت ليا اصبرى وربنا هيراضيكى يمكن الكلمه دى خففت عنى اوى جوزى نزلنى شقتى وكانت أول مره يحضنى بعد جوازه يمكن عياكى زاد كان نفسي اسأله فين حبك ليا وسؤالك عنى فين لما قولتلى انا ضهرك وسندك وراجلك فين وفين بس خوفت مبقتش حتى اتكلم معاه براحتى مبقتش اعرف المهم بعد ٨ سنين من جوازه لاقيت مراته كل يوم ياخدها يكشف عليها ويسيبولى العيال كانت فرحتى بالعيال لا توصف كنت بذاكر لهم واكلهم واشربهم. واحميهم لدرجه أن واحد منهم قالى انتى احن من امى انا بحبك اوى عيشت شهرين ف سعاده بالعيال دول وبعدها عرفت من جوزى أن مراته عندها سرطان ف الثدى والسرطان انتشر ف جسمها وهتاخد كيماوى طبعا صدمه طلعتلها جرى ونسيت كل حاجه قالتلى دا ذنب اللى عملته فيكى قلتلها مسامحه بس خلى بالك من نفسك قالت لا انا هموت وانت حوزك هيرجعلك وفوقهم عيال كنت منهاره وفضلت اسبوعين قبل ما تاخد كيماوى كانت ماتت حماتى ف الفتره دى كانت بتكلمنى كويس وبعد وفاة ضرتى ب شهرين حماتى عايزه تاخد منى العيال وعايزه ابنها يتجوز تانى استغربت قلتلها حجتك العيال اهم فى. عيلين عايزه ايه تانى. قالت اللى مكنتش أتوقعه قالت مستحيل احلى ابنى يعيش معاكى دنتى عيلتك اوطى عيله ف البلد كفايه أن ملكيش اهل انا اصلا مبحبكيش ولا يشرفنى تكونى مرات ابنى وانتى السبب ف موت ضرتك بدعاويكى عليها مقدرش اقول غير حسبي اللہ ونعم الوكيل. وطلبت من جوزى الطلاق وقتها كان معايا مبلغ تحويشه من مصروف البيت اللى كان بيديهولى مكنت بصرف اصلا وهو كان بيدينى كتير من هنكر ومعايا دهبي قلت ف بالى اروح ااجر اوضه بحمام وافعد فيها 

المبلغ الى كله معايا بالدهب عمل ١٥٠ الف اشتريت شقه ف الدور الارضى ف نفس الشارع وفتحت الاوضه اللى ع الشارع محل بقاله كويس الحمد لله وعيشت فيها ٥ سنين لوحدى كل يوم كنت لازم اشوفه واطمن انه بخير حتى اولاده كانو كبرو كانو بيجولى من غير ما جدتهم تعرف وكنت بذاكر لهم ووالدهم بعد طلاقها رفض يتجوز. جم الاولاد ف يوم قالو جدتى مغمى عليها هى مريضه سكر للعلم جريت روحتلها ووديتها المستشفى والحمد لله بقت كويسه يمكن بعدها لانت شويه بقت تمشى ترمى السلام المهم ف الوقت ده كان عمرى وصل ٣٩ سنه تقريبا فجأه كده بعد ما حماتى خرجت من المستشفى باسبوع لاقيتها داخله عليا المحل وقعدت معايا وطول القاعده كلام عام كنت فرحانه اوى وقلت فيه امل تكلمنى ارجعله كان واحشنى اوى. بس متكلمتش ف الوفت ده مشيت ومشى الامل تانى معاها كنت كل يوم اصلى للقيام وادعى ربنا يجمعنا بيه تانى فضلت تكرر الزياره ٤ مرات ومنهم مره فضلت طول اليوم معايا وكنت بعمل غدا دخلت عملت معايا ولما تعبت دخلت نامت ع الكنبه عادى ذى بيتها استغربت اوى وبعدها صحيت وقعدت تعيط وقالتى سامحينى ومتزعليش منى انا ضيعت ابنى بعمايلى هو تعبان من غيرك ومبنمش واوقات كتير بشوفو ماسك صوركم وبيعيط ارجعى له عشان خاطرى هو بيحبك انا اللى ضيعتو وقعدت تعيط. انا بحبه وعارفه أن كل حاجه غصب عنه محدش يقول انهومعندوش شخصيه لا هو راجل والله بس بيخاف على زعل امه بيخاف يعمل حاجه تزعلها وتموت بسبب مرضها كتير قالى استحملي بس يمكن انا اللى غبيه 

المهم روحت معاها وقفلت المحل ف اليوم ده وروحت روقت البيت ونضفته وغيرت نظام الشقه والاولاد معايا وكل كلام يقولو حاضر ونعم وجهزت اكل كويس من اللى هو بيحبها حماتى قالت انا هجيب المأذون. وهو داخل حماتى فتحت الشقه اللى تحت كنت مروقها عشان قالت انها هتعيش فيها وانا اطلع شقتى المهم ناديت على جوزى ولاقى المأذون واخواله قالها مش هتجوز تانى ابوس ايدك مش عايز وطلع ع الشقه فوق لاقنى فيها مش قادره اوصف السعاده اللى كانت ف عيونا وقتها ونزل طبعا واتجوزنا تانى والحمد لله الدنيا بدأت تضحك تانى و وبفضل الله بعد رجوعنا ب سنه بقي عندى بنت وسميتها على اسم حماتى حبيبه 

يعنى بقا عندى ٣ اولاد 

احمد ومصطفى وحبيبه ما اكرمك يا رب العالمين 

انا اسفه الاطاله بس كان نفسي اتكلم وفعلا انا كده ارتحت متنسوش ادعولها 

شاركة قصص الموقع لتدعيمنا وشكرا واعمل اعجاب بالصفحه لمتابعة المزيد 

صفحتنا علي الفيسبوك  دقة قلب -DAQIT ALB